Róbert Aron áfram á Hlíðarenda

Handknattleiksmaðurinn Róbert Aron Hostert hefur skrifað undir nýjan samning var Íslands- og bikarmeistara Vals. Gildir nýi samningurinn til næstu tveggja ára eða fram til loka keppnistímabilsins vorið 2024.

Róbert kom til Vals árið 2018 frá ÍBV og hefur verið lykilmaður í liðinu síðan, jafnt í vörn sem sókn. Hann gekkst undir aðgerð á hægri öxl eftir fyrstu leikina í haust en er óðum að jafna sig. Ekki er við öðru búist en Róbert Aron verði klár í slaginn með Val þegar keppni hefst á ný í Olísdeildinni upp úr næstu mánaðarmótum.

Auk þess að hafa leikið með ÍBV lék Róbert Aron um skeið með Mors-Thy í Danmörku veturinn 2015/2016 auk Fram.