Handknattleiksmaðurinn Róbert Sigurðarson hefur ákveðið að róa á önnur mið í sumar eftir eins árs dvöl hjá norska úrvalsdeildarliðinu í Drammen. Hann nýtti sér uppsagnarákvæði í tveggja ára samningi sínum við félagið. Eftir því sem næst verður komist hefur Róbert í hyggju að vera áfram úti. Ef ekkert hleypur á snærið þá stefnir hugur hans heim til Íslands.
Róbert segir í samtali við heimasíðu Drammen að ákvörðunin um að yfirgefa félagið sé fyrst og síðast hans sjálfs. Tímabilið hafi gengið upp og ofan og tækifærin ekki eins mörg og vonir stóðu til.
Róbert, sem er Akureyringur að upplagi og lék m.a. með Akureyri handboltafélagi, var í sex ár með ÍBV, frá 2017 til 2023 og varð tvisvar Íslandsmeistari og jafn oft bikarmeistari á þeim tíma.
Drammen hafnaði í fimmta sæti norsku úrvalsdeildarinnar á leiktíðinni. Liðið vann Runar í átta liða úrslitum úrslitakeppninnar en féll úr leik fyrir meisturum Kolstad í undanúrslitum fyrr í þessari viku.
