Rúnar Kárason reiknar með að leika á ný með ÍBV eftir þrjár til fjórar vikur. Hann hefur ekkert leikið með ÍBV eftir að keppni í Olísdeildinni hófst í byrjun febrúar og hefur svo sannarlega verið skarð fyrir skildi hjá Eyjaliðinu enda er Rúnar markahæsti leikmaður liðsins og einn af bestu leikmönnum deildarinnar.
Hálfur mánuður er liðinn síðan Rúnar fór í lítilsháttar aðgerð á öðru hné, nauðsynlega hressingu. Hann hafði kennt sér eymsla í vetur enda hefur mjög reynt á hné hans á ferlinum og krossband slitnað.
Eftir lagfæringarnar vonast Rúnar til þess að geta beitt sér af krafti út keppnistímabilið með ÍBV-liðinu. Leikmenn Eyjaliðsins bíta ævinlega í skjaldarrendur þegar röðin kemur að úrslitakeppninni. Þá kemur sér vel að hafa Rúnar í fínu formi.
„Sennilega líða þrjár til fjórar vikur þangað til ég mæti til leiks aftur,“ sagði Rúnar við handbolta.is á laugardaginn þegar staðfest voru vistaskipti hans til Fram á komandi sumri.
ÍBV sækir næst Hörð heim til Ísafjarðar á fimmtudaginn. Um er að ræða viðureign sem slá varð á frest í byrjun desember vegna þátttöku ÍBV í Evrópubikarkeppninni og síðar vegna ófærðar. Þremur dögum síðar sækir ÍBV liðsmenn ÍR heim í Skógarsel.
Staðan í Olísdeildunum og næstu leikir.
