Eyjamenn geta þakkað Rúnari Kárasyni fyrir sigurinn á Gróttu í upphafsleik 9. umferðar Olísdeildar karla í handknattleik í Vestmannaeyjum í dag. Hann hjó á hnútinn þegar kom fram yfir miðjan síðari hálfleik og ekkert gekk hjá ÍBV-liðinu sem var undir. Fjögur mörk hans í röð lögðu grunn að fjögurra marka forskoti sem ÍBV náði á kafla og nægði liðinu til þess að vinna með þriggja marka mun, 34:31.
Gróttumenn minnkuðu muninn í eitt mark, 32:31, skömmu fyrir leikslok eftir að hafa skorað fjögur mörk í röð. Nær komust gestirnir ekki en þeir voru síst lakara liðið lengst af. Munurinn var sá að Rúnar leikur aðeins með öðru liðinu. Hann skoraði 11 mörk í 16 skotum, skapaði fjögur marktækifæri og átti þrjár stoðsendingar.
ÍBV var marki yfir í hálfleik, 16:15. Með sigrinum færðist Eyjaliðið upp í fimmta sæti deildarinnar með 10 stig eftir átta leiki. Grótta er sem fyrr með fimm stig í níunda sæti og á leik til góða.
Mörk ÍBV: Rúnar Kárason 11, Kári Kristján Kristjánsson 4, Dánjal Ragnarsson 4, Arnór Viðarsson 3, Gabríel Martinez Róbertsson 3, Janus Dam Djuhus 3, Dagur Arnarsson 3, Róbert Sigurðarson 2, Elmar Erlingsson 1/1.
Varin skot: Petar Jokanovic 8, 25% – Jóhannes Esra Ingólfsson 1, 12,5%.
Mörk Gróttu: Þorgeir Bjarki Davíðsson 7, Jakob Ingi Stefánsson 6, Andri Þór Helgason 4/2, Theis Koch Søndergard 4, Ágúst Emil Grétarsson 3, Daníel Örn Griffin 2, Elvar Otri Hjálmarsson 1, Hannes Grimm 1, Akimasa Abe 1, Ari Pétur Eiríksson 1, Lúðvík Thorberg Arnkelsson 1.
Varin skot: Einar Baldvin Baldvinsson 16, 34% – Daníel Andri Valtýsson 1, 33,3%.
Handbolti.is fylgdist með leiknum í textalýsingu hér fyrir neðan.
