Handknattleiksparið Rut Arnfjörð Jónsdóttir og Ólafur Gústafsson flytur suður sumar eftir fjögur góð ár á Akureyri. Þetta hefur handbolti.is samkvæmt heimildum.
Ólafur lýkur keppnistímabilinu með KA sem stendur í ströngu við að tryggja sér sæti í úrslitakeppni Olísdeildar þegar þrjár umferðir eru eftir.
Rut, sem hefur verið ein allra fremsta handknattleikskona landsins í hálfan annan áratug, var í fæðingarorlofi í vetur.
Rut var í þrjú ár kjölfesta KA/Þórsliðsins og fór m.a. á kostum leiktíðina 2020/2021 þegar liðið varð Íslandsmeistari í fyrsta sinn og var um tíma handhafi allra titlanna í handknattleik kvenna. Einnig er Rut ein leikreyndasta landsliðskona Íslands og á að baki 115 landsleiki.
Framhaldið óvíst
Eftir því sem næst verður komist liggur ekki fyrir hvort, og þá ef, með hvaða liðum Rut og Ólafur leika á höfuðborgarsvæðinu á næsta keppnistímabili.
Ólafur er FH-ingur að upplagi en lék einnig með Stjörnunni keppnistímabilið 2016/2017 þegar hann millilenti hér heima eftir að hafa leikið með Flensburg og Aalborg og áður en hann gekk til liðs við KIF Kolding 2017 í Danmörku þar sem Rut lék með Danmerkurmeisturum Esbjerg.
Rut lék HK upp yngri flokki og upp í meistaraflokk en fór til Danmerkur þegar hún var innan við tvítugt og lék í 12 ár með fremstu félagsliðum Danmerkur við góðan orðstír. Rut varð m.a. danskur meistari með Esbjerg og EHF-bikarmeistari með Team Tvis Holstebro 2013.
