- Auglýsing -

Rýr uppskera á heimavelli

Arnar Birkir Hálfdánsson kveður EHV Aue í lok keppnistímabilsins eftir tveggja ára veru. Mynd/EHV Aue

Íslendingaliðið EHV Aue náði aðeins í annað stigi í kvöld í viðureign sinni við Konstanz á heimavelli í þýsku 2. deildinni í handknattleik, 27:27. Leikmenn Konstanz jöfnuðu metin þegar um ein mínúta var til leiksloka og þar við sat. Einnig var jafnt í hálfleik, 14:14.

Aue er í 9. sæti deildarinnar en Konstanz er í 16. sæti og í bráðri fallhættu. Tvö af liðunum þremur fyrir neðan hafa leikið mun færri leiki, þar á meðal Ferndorf en liðsmenn þess liðs virðast til alls líklegir eftir að hafa loksins tekist að reka kórónuveiruna úr sínum herbúðum.

Arnar Birkir Hálfdánsson skoraði ekki mark fyrir Aue í leiknum en átti sex stoðsendingar. Sveinbjörn Pétursson markvörður var daufur. Hann varði aðeins tvö skot á þeim nærri hálftíma sem hann stóð vaktina í markinu. Rúnar Sigtryggsson er sem fyrr þjálfari Aue  og verður út leiktíðina á meðan aðalþjálfari liðsins  nær heilsu eftir að hafa veikst lífshættulega af kórónuveirunni í nóvember eins og áður hefur verið getið, m.a. á handbolta.is.

HSV Hamburg, N-Lubbecke og Gummersbach berjast um efstu sætin tvö. Ekkert liðanna átti leik í kvöld. Hamburg er efst með 42 stig, N-Lubbecke 40 og Gummersbach 39. Hvert þeirra hefur leikið 26 leiki.

- Auglýsing -
- Auglýsing -

Nýjustu fréttir

- Auglýsing -