Bjarni Ófeigur Valdimarsson og samherjar hans í IFK Skövde tókst í dag að ná fram hefndum gegn Ystads IF HF með sigri á heimavelli, 28:27, í hörkuleik. Liðin háðu einvígi um meistaratitilinn í vor og hafði Ystads betur eftir umdeildan lokaleik.
Bjarni Ófeigur skoraði fimm mörk í dag í 15 skotum og átti tvær stoðsendingar. Hann var markahæstur hjá Skövdeliðinu ásamt Jonas Burud.
Skövde er næst efst í deildinni með níu stig að loknum fimm leikjum. Kristianstad trónir á toppnum, stigi á undan Skövde.
Ystads IF HF, sem dróst á dögunum í riðil með Val í Evrópudeildinni, hefur ekki náð sér á flug til þessa og er í næst neðsta sæti með tvö stig.
Höfðu sig lítt í frammi
Ásgeir Snær Vignisson og Tryggvi Þórisson léku með þegar lið þeirra, Helsingborg og Sävehof skildu jöfn, 29:29, í Helsingborg í dag. Hvorugum lánaðist að skora. Ásgeir Snær átti eitt markskot á heimavellinum. Tryggvi lék mest til sín taka í vörninni og var einu sinni vísað af leikvelli í tvær mínútur.
Færeyingurinn Óli Mittún skoraði heldur ekki fyrir Sävehof.
Margir leikmenn Sävehof eru fjarverandi vegna meiðsla um þessar mundir, þar á meðal Færeyingurinn snjalli, Elias Ellefsen á Skipagøtu.
