- Auglýsing -
Saga Sif Gíslasdóttir markvörður Vals og landsliðsmarkvörður leikur ekki fleiri leiki með Val á þessu keppnistímabili. Hún lék sinn síðasta leik í bili þegar Valur vann KA/Þór í lokaumferð Olísdeildar á skírdag.
Saga Sif segir frá þeim gleðitíðindum á samfélagsmiðlum að hún og Breki Dagsson leikmaður Fram eigi von á barni næsta vetur.
Saga Sif kom til Vals fyrir keppnistímabilið 2020 og hefur verið síðan verið ein af betri markvörðum deildarinnar og m.a. átt sæti í landsliðinu með reglubundnum hætti, síðast á haustdögum.
Af þessu leiðir að Saga Sif leikur ekki með Val í úrslitakeppninni sem er framundan. Sara Sif Helgadóttir og Signý Pála Pálsdóttir munu standa vaktina í marki Vals auk þess sem Andrea Gunnlaugsdóttir verður til taks en hún hefur ekkert leikið með Val á þessari leiktíð.
Valur samdi nýverið við Hrafnhildi Önnu Þorleifsdóttur, markvörð FH. Hún kemur ekki til félagsins fyrr en í sumar.
- Auglýsing -
