„Samningur minn við Sádana rann út auk þess sem fá verkefni eru framundan,“ sagði Erlingur Birgir Richardsson handknattleiksþjálfari við handbolta.is í morgun þegar hann staðfesti frétt handbolta.is í gær að hann væri hættur störfum landsliðsþjálfara Sádi Arabíu í handknattleik karla.
Samningurinn sem Erlingur gerði í ágúst á síðasta ári rann út að loknu Asíumótinu sem fram fór í Barein í síðasta mánuði.
„Einnig var gerði krafa um að ég þyrfti að búa í Sádi sem ég hef ekki áhuga á,“ sagði Erlingur ennfremur um starfslok sín hjá handknattleikssambandi Sádi Arabíu sem hann sagði hafa verið virkilega áhugaverða reynslu.
Eftir þrjú mót í haust og í vetur eftir að Erlingur tók við, Asíuleikar, undankeppni Ólympíuleika og Asíumót, eru engir mótsleikir framundan hjá landsliði Sádi Arabíu á þessu ári. Erlingur sagði að sú staðreynd hafi einnig orðið til þess að ekki varð framhald á samstarfi hans við Sáda.
Sádar höfnuðu í 9. sæti í Asíukeppninni í Barein og voru nokkuð frá því að tryggja sér keppnisrétt á heimsmeistaramótinu sem fram fer í janúar á næsta ári. Asíukeppnin var undankeppni fyrir HM og öðluðust fjögur efstu landsliðin keppnisrétt á HM sem fram fer í Danmörku, Króatíu og Noregi. Sætin komu í hlut Katar, Japan, Barein og Kúveit.
Erlingur stýrði ÍBV til sigur á Íslandsmóti karla í handknattleik vorið 2023 og árið á undan hlaut ÍBV silfurverðlaun.
