Daníel Freyr Andrésson og félagar í Guif voru vonsviknir í kvöld eftir tap fyrir Sävehof, 31:28, eftir framlengingu í annarri viðureign liðanna í 8-liða úrslitum sænsku úrvalsdeildarinnar í handknattleik í kvöld. Leikið var á heimavelli Guif í Eskilstuna. Sävehof hefur þar með tvo vinninga í rimmunni gegn engu Guif-liðsins.
Staðan var jöfn, 23:23, eftir 60 mínútna leik þar sem Daníel Freyr og samherjar voru lengst af með frumkvæðið og á tíðum ágæta forystu. Sävehof, sem varð deildarmeistari, var sterkara á endasprettinum og tryggði sér framlengingu þar sem liðið sýndi klærnar.
Daníel Freyr stóð allan leikinn í marki Guif og varði 12 skot, þar af tvö af fjórum vítaköstum sem hann fékk á sig. Þetta lagði sig út á 29,2% hlutfallsmarkvörslu.
Liðin mætast í þriðja sinn á sunnudaginn í Partille, heimavelli Sävehof. Þá getur Sävehof innsiglað sæti í undanúrslitum.
Ystads IF, sem hafnaði í öðru sæti deildarinnar, jafnaði kvöld metin í einvígi sínu við Lugi með öruggum sigri á útivelli, 24:15.
