Selfoss hefur samið við spænska skyttu

Selfoss hefur samið við spænska hægri handarskyttu, Álvaro Mallols Fernandez, til næstu tveggja ára. Álvaro, sem er 23 ára gamall, og kemur frá Torrevieja hvar hann hefur leikið síðustu árin, eftir því sem fram kemur í tilkynningu handknattleiksdeildar Selfoss.

Forráðamenn Selfoss og Þórir Ólafsson þjálfari Selfossliðsins binda miklar vonir við liðsaukann sem falin er í Spánverjanum sem eykur á breidd sóknarhluta liðsins fyrir átökin í Olísdeildinni á næstu leiktíð.

„Álvaro er mjög spennandi leikmaður sem vert verður að fylgjast með í Olísdeildinni á næsta ári. Handknattleiksdeildin er virkilega ánægð með að Alvaro hafi ákveðið að koma til Selfoss,“ segir í tilkynningu handknattleiksdeildar Selfoss.