Sérsveitin, stuðningsmannaklúbbur íslensku landsliðanna í handknattleik, er að sjálfsögðu mætt til Stafangurs til þess að standa þétt við bakið á íslenska landsliðinu í handknattleik kvenna sem hefur keppni á heimsmeistaramótinu í dag klukkan 17, eða 18 að staðartíma.
Upphitunarpartý verður fyrir alla stuðningsmenn íslenska landsliðsins á veitingastaðnum Beverly Hills fun pub í miðbæ Stafangurs (Skagenkaien 11A) frá klukkan 14 að staðartíma í dag, segir í tilkynningu sérsveitarinnar. Þar verður boðið upp á andlitsmálningu og íslenska tónlist og mikið fjögur.
Keppnishöllin verður opnuð fyrir áhorfendum klukkan 16.30 að staðartíma og verður hægt að fara með strætó frá veitingastaðnum Beverly Hills fun pub að DNB-Arena en um skamman veg er að fara.
Reiknað er að eitthvað á annað hundrað stuðningsmenn íslenska landsliðsins verði á leiknum við Slóvena sem hefst klukkan 17 að íslenskum tíma – 18 að staðartíma í Stafangri. Fylgst verður með leiknum á handbolti.is.
