Sigtryggur Daði Rúnarsson er á leiðinni til austurríska liðsins Alpla Hard sem Hannes Jón Jónsson þjálfar. Erlingur Richardsson staðfesti þetta í samtali við Seinni bylgjuna á Stöð2sport að loknum leik Aftureldingar og ÍBV í Olísdeildinni í kvöld.
Vísir.is segir ennfremur frá þessum tímabundnu vistaskiptum Sigtryggs Daða.
Erlingur sagði Sigtrygg Daða vera lánaðan til austurríska liðsins til ársloka og verða tilbúin í slaginn með liðinu í riðlakeppni Evrópudeildarinnar sem hefst á þriðjudaginn.
Erlingur sagðist ennfremur ekki eiga von á öðru en að Sigtryggur Daði snúi til baka til Vestmannaeyja í upphafi nýs árs. Hannes Jón þjálfari Alpla Hard hafi haft samband og kannað hvort möguleiki væri að fá Sigtrygg að láni og það hafi orðið að samkomulagi. Erlingur sagði tækifærið vera kærkomið fyrir Sigtrygg Daða.
Sigtryggur Daði er á sínu þriðja keppnistímabili með ÍBV. Hann er 26 ára gamall og hefur leikið með þýsku liðunum EHV Aue, Balingen-Weilstetten og Lübeck-Schwartau.
Apla Hard er í efsta sæti austurrísku 1. deildarinnar með 13 stig eftir sjö leiki. Einnig leikur Alpla Hard í Evrópudeildinni og sækir Sporting heim til Lissabon á þriðjudagskvöld.
