Sigurgeir Jónsson tekur við þjálfun kvennaliðs Stjörnunnar í sumar af Hrannar Guðmundssyni. Stjarnan tilkynnti fyrir stundu að Sigurgeir hafi skrifað undir samning þess efnis.
Sigurgeir þekkir vel til hjá meistaraflokksliði Stjörnunnar. Hann er hægri hönd fráfarandi þjálfara auk þess sem Sigurgeir hefur þjálfað elstu flokka kvenna síðustu fimm ár, eftir því sem fram kemur í tilkynningu handknattleiksdeildar Stjörnunnar.
Áður en Sigurgeir fór að þjálfa hjá Stjörnunni var hann um árabil hjá Fram og var m.a. aðstoðarþjálfari meistaraflokksliðs kvenna þegar Fram varð Íslandsmeistari undir stjórn Stefáns Arnarsonar 2017 og vann tvöfalt árið eftir.
„Ég er spenntur fyrir þessu verkefni sem ég er að taka að mér. Einhverjar breytingar verða á leikmannahópnum en til staðar er góður grunnur, blanda af reyndari leikmönnum og ungum efnilegum stelpum sem eru að koma upp úr yngri flokka starfinu. Stjarnan er stórveldi í íslenskum kvennahandbolta og stefnan að byggja upp gott lið til frambúðar,“ er m.a. haft eftir Sigurgeiri í tilkynningu Stjörnunnar.
