Íslendingar í dönsku úrvalsdeildinni hrósuðu sigri í dag með liðum sínum. Danmerkurmeistarar Aalborg höfðu betur í heimsókn sinni til Sjálands, 33:26. Viktor Gísli Hallgrímsson og samherjar í GOG lögðu Bjerringbro/Silkeborg í háspennuleik, 31:30, á heimavelli fyrir framan troðfullt hús áhorfenda sem taka því fagnandi að hömlum á komum þeirra á íþróttakappleiki í landinu hefur verið aflétt.
Viktor Gísli Hallgrímsson stóð í marki GOG hluta leiksins og varði fjögur skot, 29%. Mathias Gidsel var að vanda atkvæðamikill hjá GOG. Hann skoraði átta mörk í 10 skotum og átti þrjár stoðsendingar. GOG er með sex stig eftir þrjá fyrstu leikina og situr í efsta sæti.
Aron Pálmarsson er frá vegna meiðsla og lék þar af leiðandi ekki með Aalborg í sigrinum á Nordsjælland. Arnór Atlason, aðstoðarþjálfari Aalborg, var að vanda á sínum stað. Aalborg er með fjögur stig eftir þrjár viðureignir.
