Nökkvi Dan Elliðason tryggði Selfossi sigur á FH í baráttuleik í Hleðsluhöllinni á Selfossi í kvöld, 25:24, þegar hann skoraði lokamark leiksins rúmum fjórum mínútum fyrir leikslok. Þrátt fyrir mikinn darraðardans í kjölfarið tókst hvorugu liði að bæta við mörkum þótt viljann hafi ekki skort.
Selfoss-liðið er þar með komið í fjórða sæti deildarinnar, hefur nú fimm stiga eftir fjóra leiki. FH er í þrepinu fyrir neðan með fjögur stig.
Staðan var jöfn að loknum fyrri hálfleik, 13:13. Heimamenn tóku vel við sér framan af síðari hálfleik og náðu á tímabili fimm marka forskoti og voru lengi vel tveimur til þremur mörkum yfir. FH-liðið neitaði hinsvegar alveg að gefast upp enda ekki til í bókum þess. Það gerði hvað það gat til þess að jafna metin og hafði nærri því náð markmiðinu í blálokin. En allt kom fyrir ekki, eins og maðurinn sagði og Selfoss fagnaði sínum öðrum sigurleik á leiktíðinni og þeim fyrsta á heimavelli.
Mörk Selfoss: Guðmundur Hólmar Helgason 6, Hergeir Grímsson 6/1, Atli Ævar Ingólfsson 4, Hannes Höskuldsson 3, Nökkvi Dan Elliðason 3, Einar Sverrisson 2, Alexander Már Egan 1.
Vilius Rasimas varði 15 skot í markinu, 38,5%.
Mörk FH: Ásbjörn Friðriksson 8/1, Ágúst Birgisson 4, Leonharð Þorgeir Harðarson 3, Birgir Már Birgisson 2, Jakob Martin Ásgeirsson 2, Einar Örn Sindrason 2, Hlynur Jóhannsson 1, Jón Bjarni Ólafsson 1, Bjarni Ófeigur Valdimarsson 1.
Phil Döhler varði 10 skot, 28,6%.
