Frakkland leikur við Króatíu í undanúrslitum heimsmeistaramóts karla í handknattleik í Zagreb Arena á fimmtudaginn eftir einn ævintýralegasta sigurmark í sögu handboltans þegar þeir lögðu Egypta, 34:33, í síðari viðureign dagsins í 8-liða úrslitum. Luka Karabatic skoraði sigurmarkið frá miðju þegar þrír tíundu hlutar úr sekúndu voru eftir af leiktímanum. Aðeins örfáum andartökum áður hafði Yahia Omar jafnað fyrir Egypta, 33:33.
Frakkaland og Króatía hafa ekki mæst í útsláttarhluta HM síðan lið þjóðanna mættust í úrslitaleik HM karla fyrir 16 árum í Zagreb.
Dómararnir fóru í skjáinn
Dómarar leiksins þurftu að skoða upptöku frá marklínunni samstillta við leikklukkuna til þess að skera úr um hvort boltinn hafi verið kominn yfir marklínuna áður en leiktíminn var úti. Skýrt kom fram að þrjú sekúndubrot voru eftir af leiktímanum þegar boltinn skilaði sér yfir marklínuna. Egyptar grétu í leikslok meðan Frakkar fögnuðu ákaft.
Egyptar voru með sjö sóknarmenn í síðustu sókn sinni til að freista þess að ná jöfnunarmarki og knýja fram framlengingu. Eftir að Omar jafnaði voru Frakkar fljótir að hugsa og koma boltanum fram á Karabatic sem kastaði rakleitt frá miðju áður en Karim Hendawy tókst að komast í markið. Hendawy gerði heiðarlega tilraun til að verja þegar hann kom eins kólfi væri skotið frá varamannabekknum. Allt kom fyrir ekki.
Leikurinn var jafn framan af fyrri hálfleik en á síðustu mínútunum tókst Frökkum að komast fjórum mörkum yfir.
Frakkar voru með frumkvæðið í síðari hálfleik. Egyptar voru aldrei langt undan og tókst nokkrum sinnum að jafna, m.a. 30:30. Frakkar skoruðu tvö mörk í röð áður en Juan Carlos Pastor þjálfari Egypta tók leikhlé tveimur og hálfri mínútu fyrir leikslok til að blása leikmönnum sínum baráttuanda í brjóst. Þrumuræða Pastors hafði sitt að segja til að vekja Egypta fyrir lokasprettinn hvar þeim gekk framlenging úr greipum á sjónarmun.
Nedim Remili og Dika Mek skoruðu sex mörk hvor fyrir franska liðið og voru markahæstir.
Ahmed Hesham skoraði átta mörk fyrir Egypta og Yahia Omar sex.
Fyrr í kvöld unnu Króatar Ungverja, 31:30, í átta liða úrslitum í miklum spennuleik.
Sjá einnig: Ótrúlegur endasprettur kom Króatíu í undanúrslit
HM “25: Leikjadagskrá, átta liða úrslit, undanúrslit
HM ’25: Forsetabikarinn, leikjadagskrá, úrslitaleikir
