- Auglýsing -
- Sigvaldi Björn Guðjónsson skoraði tvö mörk þegar Vive Kielce vann stórsigur á Gwardia Opole, 40:24, á heimavelli í annarri umferð pólsku úrvalsdeildarinnar í handknattleik í gærkvöld. Haukur Þrastarson var ekki í leikmannahópi pólsku meistaranna sem unnið hafa tvo fyrstu leiki sína í deildinni. Það kemur ekki ýkja mikið á óvart en liðið vann deildina á síðasta ári án þess að tapa leik.
- Íslendingaliðið Guif frá Eskilstuna er komið í átta liða úrslit sænsku bikarkeppninnar í karlaflokki eftir tvo sannfærandi sigra á Vinslövs í 16-liða úrslitum. Síðari leikurinn fór fram í Eskilstuna í gærkvöld og lauk með tveggja marka sigri Guif, 29:27. Samanlagt vann liðið, 55:47, í leikjunum tveimur. Daníel Freyr Andrésson varði mark Guif að vanda. Aron Dagur Pálsson sem kom til liðsins í sumar skoraði ekki mark að þessu sinni.
- Katrine Lunde markvörður norska landsliðsins og Evrópumeistara Vipers Kristiansand fær ekki að yfirgefa félagið. Lunde sem er 41 árs fékk tilboð frá CSKA í Moskvu á dögunum en eiginmanni hennar, Nikola Trajkovic, stendur til boða starf sem þjálfari hjá einu af betri knattspyrnuliðum Rússlands. Ole Gustav Gjekstad, þjálfari Vipers, segir að ekki komi til greina að losa Lunde undan samningi sem hún á tvö ár eftir af. Lunde segist vera vonsvikin en verða að bíta í súra eplið. Líklegt er að eiginmaðurinn þiggi starfið í Rússlandi en Lunde verði eftir heima ásamt börnum. Hinsvegar er talið að stífni forráðamanna Vipers geti orðið til þess að Lunde nýti fyrsta tækifærið sem hún hefur til að segja samningi sínum upp en í honum eru uppsagnarákvæði.
- Þjóðverjinn Manfred Prause lést á laugardaginn 82 ára gamall. Prause var lengi alþjóðlegur dómari og dæmdi á tugum stórmóta áður en hann varð eftirlitsmaður og stjórnarmaður hjá Alþjóða handknattleikssambandinu og Handknattleikssambandi Evrópu. Síðast var Prause formaður reglu- og dómaranefndar Alþjóða handknattleikssambandsins frá 2009 til 2017.
- Handknattleikssamband Úkraínu staðfesti í gær ráðningu Michael Biegler í starf þjálfara karlalandsliðs þjóðarinnar í handknattleik. Biegler hefur marga fjöruna sopið og m.a. þjálfað pólska karlalandsliðið og kvennalandslið Þýskalands. Hann hefur einnig þjálfað mörg félagslið. Síðast var Biegler þjálfari kvennaliðs Bayer Leverkusen en hætti í lok nóvember á síðasta ári.
- Auglýsing -
