Reynir Stefánsson, formaður dómaranefndar HSÍ, er einn í framboði til varaformanns HSÍ á þingi sambandsins sem fram fer í Origohöllinni á morgun. Kosið er til embættisins til eins árs að þessu sinni. Davíð B. Gíslason, sem var endurkjörinn varaformaður HSÍ til tveggja ára á þinginu fyrir ári, féll frá fyrr á þessu ári.
Ekki er útlit fyrir að hart verði barist um sæti í stjórn HSÍ á þinginu.
Kristján Gaukur Kristjánsson gefur einn kost á sér til formanns dómaranefndar HSÍ í stað Reynis. Kristján Gaukur hefur ekki setið í stjórn HSÍ fram til þessa.
Kjörtímabil Arnars Þorkelssonar gjaldkera HSÍ, Kristínar Þórðardóttur formanns mótanefndar, Guðríðar Guðjónsdóttur formanns landsliðsnefndar kvenna og þriggja varamanna rennur út á þinginu. Arnar, Kristín og Guðríður gefa öll kost á sér á ný og virðist ekkert koma í veg fyrir endurkjör þeirra.
Alfreð Örn Finnsson og Hrafnhildur Ósk Skúladóttir, sem setið hafa í varastjórn gefa kost á sér til endurkjörs til eins árs. Guðmundur Þór Jónsson sækist ekki eftir endurkjöri og gerir uppstillingarnefnd það að tillögu sinni að Ragnar Lárus Kristjánsson taki sæti Guðmundar Þórs. Aðrir hafa ekki gefið kost á sér.
Guðmundur B. Ólafssson, formaður HSÍ, var endurkjörinn til tveggja ára á þinginu fyrir ári. Um leið voru Inga Lilja Lárusdóttir, Jón Viðar Stefánsson, Páll Þórólfsson kjörin í stjórn HSÍ til tveggja ára.
