- Auglýsing -
Óhætt er að segja að skammt sé stórra högga á milli hjá Íslandsmeisturum Fram í handknattleik kvenna. Í gær var greint frá að samningur hafi náðst við Tamara Jovicevic frá Svartfjallalandi. Í dag tilkynnir Fram um komu finnsku skyttunnar Madeleine Lindholm.
Lindholm, sem er 27 ára gömul, er örvhent skytta og sterkur varnarmaður að auki eftir því sem fram kemur í tilkynningu frá Fram. Lindholm er væntanleg í Úlfarsárdalinn um mánaðarmótin.
Lindholm kemur frá liði Sjundeå IF sem er staðsett skammt frá Helsinki. Hún hefur leikið 268 leiki fyrir Sjundeå frá árinu 2011 og skorað 1.438 mörk. Lindholm hefur verið með aðsópsmestu leikmönnum finnsku úrvalsdeildarinnar.
Með komu Lindholm og Jovicevic gera Framarar sér vonir um að hafa styrkt lið sitt verulega fyrir átökin í Olísdeildinni og bikarkeppninni sem framundan er á næstu mánuðum.
Fyrir tímabilið hættu Hildur Þorgeirsdóttir og Stella Sigurðardóttir. Emma Olsson réri á ný handknattleiksmið auk þess sem Karen Knútsdóttir og Ragnheiður Júlíusdóttir eru fjarverandi. Ragnheiður hefur alls ekki jafnað sig af mjög slæmum veikindum sem herjuðu á hana undir lok síðasta árs og í byrjun þessa.
handbolti.is nýtur ekki opinbers rekstrarstuðnings.
- Auglýsing -
