- Auglýsing -

Skellur hjá Ágústi og félögum

Ágúst Elí Björgvinsson í leik með Kolding í haust. Mynd/Jón Oddur

Ágúst Elí Björgvinsson og félagar í KIF Kolding fengu skell í kvöld þegar þeir sótti Århus Håndbold heim til Árósa. Eftir jafnan fyrri hálfleik virtist flest hafa farið í skrúfuna hjá leikmönnum Kolding í seinni hálfleik sem varð þess valdandi að þeir töpuðu með níu marka mun, 33:24. Þar réði ekki hvað minnstu að markvörður Århus Håndbold, Christoffer Hoffmann Bonde, varði eins og berserkur og var með 50% hlutfallsmarkvörslu þegar upp var staðið.

Staðan að loknum fyrri hálfleik var jöfn, 15:15.

Þar með komst Århus Håndbold upp í níunda sæti deildarinnar, hafði sætaskipti við Kolding, sem er komið í 10. sæti. Hvort lið hefur átta stig að loknum níu umferðum en 14 lið eru í dönsku úrvalsdeildinni í karlaflokki.

Ágúst Elí náði sér ekki á strik í kvöld frekar en kollegi hans Tim Winkler. Ágúst varði 2 skot og Winkler 5.

Peter Balling skoraði átta mörk fyrir Kolding og Nikolaj Jörgensen fimm.

Mads Peter Löndborg skoraði níu mörk fyrir Árósarliðið. Annars var það markvörður liðsins sem stóð upp úr, hinn 21 árs gamli Christoffer Hoffmann Bonde. Hann varði 24 skot og var með 50% hlutfallsmarkvörslu sem er hreint með ólíkindum.

Staðan í dönsku úrvalsdeildinni í karlaflokki.

- Auglýsing -
- Auglýsing -

Nýjustu fréttir

- Auglýsing -