„Ég skil ekki alveg af hverju þetta er gert svona en við erum með fólk í hreyfingunni sem ákveður hlutina og við bara förum eftir því,“ sagði Sebastian Alexandersson, þjálfari karlaliðs Fram, þegar handbolti.is leitaði viðbragða hjá honum við þeirri ákvörðun að hefja keppni ekki í Olísdeild karla fyrr en 9. maí að undanskildum tveimur frestuðum leikjum sem leiknir verða um aðra helgi.
Sebastian segist hefði viljað byrja keppni í Olísdeildinni af krafti sem fyrst þrátt fyrir landsleikjahléið sem framundan en einn leikmaður Fram-liðsins, Vilhelm Poulsen, hefur verið valinn í færeyska landsliðið sem leikur þrjá leiki frá 26. apríl til 2. maí.
„Ég sjálfur hefði viljað byrja strax í næstu viku og spila síðan í landsliðspásunni í stað þess að bíða eftir 9. maí þar sem aðstæður eru orðnar æði sérstakar og deildin ætti því að hafa forgang umfram landsliðið úr því sem komið er,“ segir Sebastian og setur einnig spurningamerki við frestun Coca Cola-bikarsins fram á haust og spyr hvort hægt sé að leika tvær bikarkeppnir á einu tímabili.
Bikarinn verður æfingamót
„Liðin munu breytast í sumar og sum þeirra mjög mikið og því hefur sú keppni í haust enga tengingu við þetta tímabil. Til dæmis hvernig geta leikmenn sem spila ekki á landinu í dag titlað sig bikarmeistara þessa tímabils? Auk þess þá verður þetta lítið meira en æfingamót í lok næsta undirbúningstímabils sem gjaldfellir keppnina. Bikarinn á meiri virðingu en þetta skilið.“
Mætti fella niður
„Ég bara næ því ekki af hverju bikarkeppni þessa tímabils er bara ekki felld alveg niður fyrst ekki vinnst tími til að spila hana og spila svo bara bikarkeppni næsta tímabils eins og hún á að vera. Algjörlega glórulaus ákvörðun sem hefur ekkert með hagsmuni handboltans að gera,“ segir Sebastian sem veltir ennfremur fyrir sér hvort leikmaður sem leikið hefur með liði í bikarkeppninni á þessari leiktíð getur orðið gjaldgengur með öðru liði í bikarkeppninni í haust. Strangt til tekið þá er það ekki heimilt þar sem leikmaður má aðeins leika með einu liði á hverju keppnistímabili.
Ekki hægt að gera öllum til geðs
„Þetta eru mín sjónarmið í þessu en við erum með HSÍ og formenn félagana til þess að taka ákvarðanir sem þeir telja bestar. Eins og alltaf í lífinu þá er bara ekki hægt að gera öllum til geðs. Einhverjir verða eflaust himinlifandi með þessa niðurstöðu sem er gott fyrir þá, verði ykkur að góðu,” sagði Sebastian Alexandersson, þjálfari karlaliðs Fram með bros á vör.
