Það skiptust á skin og skúrir hjá íslensku handknattleiksmönnunum í sænsku bikarkeppninni í dag. Daníel Freyr Andrésson og Aron Dagur Pálsson fögnuðu sigri en Teitur Örn Einarsson og félagar töpuðu.
Daníel Freyr stóð í marki Guif frá Eskilstuna þegar liðið vann Vinslövs sem á sæti í næstu efstu deild, 26:20, á útivelli eftir að hafa verið fjórum mörkum yfir, 13:9, að loknum fyrri hálfleik. Aron Dagur skoraði ekki mark en Daníel Freyr gerði sér lítið fyrir og skoraði einu sinni auk þess að standa vaktina á milli stanganna.
Teitur Örn skoraði þrjú mörk fyrir IFK Kristianstad þegar liðið tapaði fyrir Skånela IF, 25:24, í Vikingahallen í Mårsta á Skáni. IFK var marki yfir í hálfleik en tapaði frumkvæði í síðari hálfleik í hendur heimaliðsins sem leikur í næstu efstu deild.
Liðin eiga eftir að mætast öðru sinni en leikið er heima og að heiman í 16-liða úrslitum bikarkeppninnar í Svíþjóð.
