Smit í herbúðum Guðjóns Vals

Einn leikmaður í herbúðum Guðjóns Vals Sigurðssonar þjálfara þýska 2. deildarliðsins Vfl Gummersbach greindist í morgun jákvæður við skimun eftir kórónuveirunni. Af þeim sökum hefur tveimur næstu leikjum liðsins verið slegið á frest.

Leikmenn Gummersbach áttu fyrir höndum tvo leiki á útivelli, gegn Rimpar í kvöld og við Ferndorf á laugardaginn. Þeir verða síðar.

Leikmenn eru komnir í sóttkví eftir því sem greint er frá Facebook-síðu Gummersbach og bíða frekari fregna. Þetta er í fyrsta sinn á keppnistímabilinu sem smit greinist í herbúðum Gummersbach.

Gummersbach situr í efsta sæti þýsku 2. deildarinnar með 12 stig að loknum sjö leikjum.

Auk Guðjóns Vals þjálfara þá leikur Eyjamaðurinn Elliði Snær Viðarsson með liðinu.