„Þetta hefur verið gott ævintýri fyrir okkur, félagið jafnt sem leikmenn og þjálfarateymið. Við erum bara spenntir að enda Evrópukeppnina í Porto,“ segir Óskar Bjarni Óskarsson þjálfari Vals í samtali við samfélagsmiðla félagsins. Óskar er kominn með sveit sína til Porto þar sem hennar bíður viðureign við samnefnd lið í sjöttu og síðustu umferð riðlakeppni Evrópudeildarinnar annað kvöld kl. 19.45.
„Í Porto er glæsileg keppnishöll og lið félagsins er mjög gott,“ sagði Óskar Bjarni ennfremur í fyrrgreindu viðtali.
Með Porto leikur m.a. landsliðsmaðurinn Þorsteinn Leó Gunnarsson. Valur og Porto skildu jöfn, 27:27, í fyrri viðureigninni sem fram fór í Kaplakrika 15. október. Er það eina stig Valsmanna í keppninni til þessa.
Porto hefur þegar tryggt sér sæti í 16-liða úrslitum ásamt Melsungen sem er í efsta sæti riðilsins. Valur og Vardar eru úr leik að þess sinni hver sem úrslitin verða í leikjum þeirra annað kvöld. Vardar fær Melsungen í heimsókn.
FH fær Fenix í Kaplakrika
Auk Valsara verða FH-ingar einnig á ferðinni annað kvöld. Þeir taka á móti franska liðinu Tenix Toulouse í Kaplakrika klukkan 19.45. FH-ingar töpuðu fyrri leiknum, 37:30, ytra en hugsa sér gott til glóðarinnar að ná fram hefndum á heimavelli vel studdir áhorfendum.
Gummersbach og Fenix Toulouse eiga sæti víst í 16-liða úrslitum. Franska liðið tapaði á heimavelli fyrir Sävehof í síðustu viku.
Evrópudeild karla “24 – riðlakeppni 32-liða – 5. umferð, úrslit, staðan
