Portúgalska handknattleiksliðið Sporting í Lissabon staðfesti í morgun að Orri Freyr Þorkelsson hafi samið um að leika með liði félagsins næstu tvö árin. Koma Hafnfirðingsins til félagsins hefur legið í loftinu um talsvert skeið. Orri Freyr kemur til Sporting frá Elverum í Noregi hvar hann hefur verið síðustu tvö ár.
Karlar – helstu félagaskipti 2023
Orri Freyr er annar íslenski handknattleiksmaðurinn sem gengur til liðs við portúgalskt félagslið á stuttum tíma. Nýverið skrifaði Stiven Tobar Valencia undir eins árs samning við hitt liðið í Lissabon, Benfica. Orri Freyr og Stiven Tobar verða tveir fyrstu íslensku handknattleiksmennirnir til þess að leika með félagsliði í efstu deild portúgalska karlahandknattleiksins.
Sporting er eitt af þremur sterkustu handknattleiksliðum Portúgals um þessar mundir. Það missti naumlega af portúgalska meistaratitlinum í vor eftir hörkukapphlaup við Porto. Liðið hefur styrkst síðustu daga og vikur og ætlar sér talsvert á næstu leiktíð.
Nánar verður fjallað um komu Orra Freys til Sporting á handbolti.is síðar í dag.
Karlar – helstu félagaskipti 2023
