FH á helmings möguleika á að fá sæti í annarri umferð Evrópubikarkeppni karla í handknattleik eftir jafntefli við Diomidis Argous í fyrri leiknum í Nea Kios-íþróttahöllinni i Argos í Grikklandi í dag, 32:32. Síðari viðureignin fer fram á sama stað á morgun og verður flautað til leiks klukkan 15.30 að íslenskum tíma.
Gríska liðið sem er með bækistöðvar um 140 km austan við Aþenu var með tveggja marka forskot að loknum fyrri hálfleik, 17:15, sem var annars hnífjafn.
Grikkirnir voru öflugri framan af síðari hálfleik og komust mest fimm mörkum yfir, 25:20, eftir liðlega 44 mínútna leik. FH-ingar sneru þá bökum saman og tókst að jafna metin, 29:29, með marki Ásbjörns Friðrikssonar þegar sex mínútur voru til leiksloka. Eftir það var leikurinn í járnum. Aron Pálmarsson kom FH yfir, 32:31, þegar nokkrar sekúndur voru til leiksloka.
Egyptinn Omar Salem jafnaði metin með sínu 11. marki þegar leiktíminn var úti, 32:32.
Jafntefl og ljóst að FH-inga bíður mjög erfitt verkefni á morgun.
Mörk FH: Birgir Már Birgisson 6, Símon Michael Guðjónsson 5, Ásbjörn Friðriksson 4, Jón Bjarni Ólafsson 4, Einar Bragi Aðalsteinsson 4, Jóhannes Berg Andrason 4, Aron Pálmarsson 3, Jakob Martin Ásgeirsson 1.
Varin skot: Daníel Freyr Andrésson 11, 26%.
Eins og áður segir hefst síðari leikurinn klukkan 15.30 á morgun. Handbolti.is ætlar að gera sitt besta til þess að fylgjast með leiknum í textalýsingu.
