Örvhenta stórskyttan Birkir Benediktsson hefur skrifað undir nýjan samning við handknattleiksdeild Aftureldingar til næstu tveggja ára. Þetta kemur fram í tilkynningu frá Aftureldingu aðeins degi eftir að þau leiðinlegu tíðindi spurðust út af Birkir hafi slitið hásin á vinstri fæti öðru sinni á rúmlega hálfu ári.
Birkir hefur verið í hópi öflugustu handknattleiksmanna Olís deildarinnar síðustu ár og burðarás í liði Aftureldingar í fjölda ára
„Birkir hefur gengið í gegnum erfið meiðsli uppá síðkastið sem hann mun sigrast á. Afturelding mun standa þétt við bakið á Birki í þeirri vegferð sem framundan er og hlökkum við mikið til að sjá hann stíga á völlinn aftur þegar sá tími kemur,“ segir í tilkynningu sem handbolta.is barst frá formanni meistaraflokksráðs karla hjá Aftureldingu, Hauki Sigurvinssyni.
