Stefán Arnarson hefur verið ráðinn þjálfari kvennaliðs Hauka í handknattleik. Honum til aðstoða verður Díana Guðjónsdóttir sem tók við þjálfun Hauka í mars og stýrði liðinu til loka leiktíðar með glæsibrag. Díana hefur áður verið aðstoðarþjálfari Gunnars Gunnarssonar og Ragnars Hermannssonar meðan þeir þjálfuðu Haukaliðið.
Stefán og Díana eru ráðin til þriggja ára. Hún mun einnig vera þjálfari U-liðs og 3. flokks kvenna hér eftir sem hingað til.
Stefán er öllum handbolta áhugamönnum kunnur. Stefán er mjög reyndur þjálfari og hefur verið einkar sigursæll með sínum liðum. Hann gerði til að mynda kvennalið Fram og Vals samtals sjö sinnum að Íslandsmeisturum og fimm sinnum að bikarmeisturum. Einnig var Stefán landsliðsþjálfari um skeið. Hann hætti hjá Fram í vor eftir níu ára starf.
Díana hefur starfað lengi hjá Haukum og er öllum hnútum kunnug á Ásvöllum. Hún hefur verið í þjálfarateymi meistaraflokks, yfirþjálfari deildarinnar og þjálfað yngri flokka. Hún hefur leikið mikilvægt hlutverk í þessari uppbyggingu kvennaflokkanna síðastliðin ár en nú í vor fagnaði 3. flokkur kvenna Íslandsmeistaratitli undir hennar stjórn.
„Haukar hafa verið í markvissri uppbyggingu með kvennaflokka félagsins síðastliðin ár og er ráðning Stefáns og áframhaldandi vera Díönu mikilvægur þáttur í því að taka næsta skref með meistaraflokkinn og festa liðið í sessi í toppbaráttunni.
Handknattleiksdeild Hauka lýsir yfir gríðarlegri ánægju með samsetningu þjálfarateymis kvennaliðsins og eru spennandi tímar fram undan hjá kvennaliðinu,” segir í tilkynningu handknattleiksdeildar Hauka í morgun.
