Víkingur hefur samið við markvörðinn Stefán Huldar Stefánsson um að leika með liði félagsins í Olísdeild karla, hið minnsta til loka leiktíðar. Stefán Huldar kemur til Víkinga frá Haukum. Hann hefur ekkert leikið með Haukum frá því á síðasta tímabili þegar hann tók þátt í fjórum leikjum.
Þetta kemur fram á félagaskiptasíðu HSÍ. Stefán Huldar getur þar með staðið á milli stanganna í marki Víkings í kvöld þegar efsta lið Olísdeildar, FH, kemur í heimsókn í Safamýri, heimavöll Víkings, klukkan 18.
Stefán Huldar er sjóaður markvörður og lék afar vel með Gróttu leiktíðina 2020/2021 og var það tímabil með allra bestu markvörðum Olísdeildar. Sumarið 2021 gekk hann til liðs á ný við uppeldisfélag sitt Hauka eftir lánasamning við Seltjarnaresliðið.
Félagaskipti Ásgeirs eru í höfn
Á vef HSÍ kemur ennfremur fram að Ásgeir Snær Vignisson verður gjaldgengur með Selfossliðinu í kvöld gegn Val í viðureign liðanna í Olísdeild karla. Ásgeir Snær flutti heim frá Fjellhammer í upphafi ársins og samdi við Selfoss.
Selfoss sækir Val heim í kvöld. Flautað verður til leiks klukkan 19.30.
Staðan og næstu leikir í Olísdeildum.
