Íslenska landsliðið í handknattleik hóf keppni á heimsmeistaramótinu í kvöld með frábærum sigri á Portúgal, 30:26, eftir að hafa átt afar góðan lokasprett þar sem markvarsla Björgvins Páls á síðustu mínútum hafði mikið að segja auk þess sem sóknarleikurinn var einnig afar góður á endasprettinum. Varnarleikurinn var frábær frá upphafi til enda.
Þetta var fyrsti sigur Íslands í upphafsleik HM í 12 ár, frá sigri á Ungverjum, 32:26, í Norrköping.
Staðan var jöfn að loknum fyrri hálfleik, 15:15.
Talsverðar sveiflur voru í leiknum. Íslenska liðið komst yfir, 7:3, en Portúgal jafnaði, 7:7. Eftir það var jafnt á nær öllum tölum tölum fram að hálfleik. Íslenska liðið hélt frumkvæðinu fram eftir síðari hálfleik en um miðjan síðari hálfleik náði portúgalska liðið gagnsókn og náði að jafna. Þeim tókst aldrei að komast yfir. Íslenska liðið stóðst álagið og var sterkara á lokasprettinum og vann sanngjarnan og sætan sigur.
Ómar Ingi Magnússon skoraði 27. markið, 27:24, í þann mund sem leiktöf var að bresta á. Magnað skot, kastað boltanum milli fóta varnarmanns portúgalska liðsins sem taldi sig hafa öll tromp á hendi.
Elliði Snær Viðarsson bætti síðan 28. markinu við skömmu síðan með frábæru skoti frá miðju vallarins sem rétt söng í marknetinu áður en portúgalski markvörðurinn náði að marki sínu. Hann hafði verð kallaður af leikvelli til að bæta púðri í sóknina meðan liðið var manni færra.
Næsti leikur verður gegn Ungverjum á laugardagskvöldið klukkan 19.30.
Mörk Íslands: Bjarki Már Elísson 9/3, Ómar Ingi Magnússon 7, Elliði Snær Viðarsson 4, Sigvaldi Björn Guðjónsson 4, Aron Pálmarsson 2, Gísli Þorgeir Kristjánsson 2, Björgvin Páll Gústavsson 1, Elvar Örn Jónsson 1.
Varin skot: Björgvin Páll Gústavsson 12, Viktor Gísli Hallgrímsson 4/1.
Mörk Portúgal: Pedro Portela 8, Rui Silva 4, Andre Gomes 2, Francisco Costa 2, Diogo Branquinho 2, Alexis Borges 1, Leonel Fernandes 1, Miguel Martins 1, Victor Iturriza 1, Alexandre Cavalcanti 1, Antonio Areia 1, Luis Frade 1, Fabio Magalhaes 1.
Varin skot: Miguel Ferreira 9, Manuel Gaspar 1.
Handbolti.is fylgdist með leiknum í textalýsingu hér fyrir neðan.
