Ungmennalið KA og Þór skildu með skiptan hlut í miklum baráttuleik í Grill 66-deild karla í handknattleik í KA-heimilinu í kvöld, 18:18. Þórsarar eru þar með komnir með þrjú stig eftir tvo fyrstu leiki sína. Ungmennalið KA vann sér inn fyrsta stigið á leiktíðinni með þessu jafntefli. KA-piltar töpuðu fyrir ungmennaliði Fram í fyrstu umferð.
KA var marki yfir að loknum fyrri hálfleik, 9:8, og náði mest þriggja marka forskoti, 13:10, eftir um 11 mínútur í síðari hálfleik.
Þórsarar unnu upp forskot KA og gott betur því þeir komust yfir, 14:13. Annars var leikurinn í járnum og einkenndist af varnarleik. Ljóst var að hvorugt liðið vildi tapa eins og títt er þegar Akureyrarliðin mætast á íþróttavellinum. Þórsarar áttu síðustu sóknina en skot Brynjars Hólm Grétarsson fór rétt yfir mark KA.
Mjög góð mæting var á leikinn í KA-heimilinu. Með þessari viðureign lauk 2. umferð Grill 66-deildar. Þriðja umferð hefst á föstudaginn þegar Harðverjar sækja Fjölnismenn heim í Fjölnishöllina.
Staðan og næstu leikir í Grill 66-deildum.
Mörk KA u.: Arnór Ísak Haddsson 9, Hugi Elmarsson 2, Skarphéðinn Ívar Einarsson 2, Haraldur Bolli Heimisson 2, Ernir Elí Ellertsson 1, Jóhann Bjarki Hauksson 1, Aron Daði Stefánsson 1.
Varin skot: Bruno Bernat 8.
Mörk Þórs: Brynjar Hólm Grétarsson 5, Halldór Kristinn Harðarson 4, Viðar Ernir Reimarsson 4, Arnór Þorri Þorsteinsson 2, Sigurður Ringsted Sigurðsson 1, Hilmir Kristjánsson 1, Aron Hólm Kristjánsson 1.
Varin skot: Kristján Páll Steinsson 11.
