„Markmiðið er að spila hópinn saman, vinna í varnarleiknum okkar og taka í heildina skref til framfara,“ sagði Díana Dögg Magnúsdóttir landsliðskona og leikmaður BSV Sachsen Zwickau í samtali við handbolta.is fyrir helgina spurð að markmiðum landsliðsins fyrir vináttuleikina tvo við Færeyinga ytra í dag og á morgun.
„Við þurfum að stilla saman strengina í varnarleiknum okkar fyrir leikina við Ísrael í undankeppni HM sem framundan eru. Varnarleikurinn okkar er aðeins agressívari en hjá flestum liðum á Íslandi. Það tekur sinn tíma fyrir leikmenn að venjast öðrum áherslum.
Það er mjög gott að fá leiki til þess að æfa sig, brjóta upp æfingaferlið. Eitthvað sem okkur vantar, það er að fá fleiri leiki og meiri reynslu. Þá er gott að sækja frænkur okkar í Færeyjum heim,“ sagði Díana Dögg Magnúsdóttir sem leikur sinn 33. landsleik í dag.
Hlekkur á streymissíðu færeyska handknattleikssambandsins. Eftir því sem næst verður komist kostar aðgangur að streyminu 39 krónur færeyskar, um 770 íslenskar.
Leikurinn í Skála í dag hefst klukkan 17.
