Stjarnan tryggði stöðu sína í þriðja sæti Olísdeildar kvenna í dag með sigri á Fram, 31:28, í 15. umferð en leikið var í TM-höllinni í Garðabæ. Þar með munar sex stigum á Stjörnunni í þriðja sæti og Fram í fjórða sæti og líklegt þar með að fjórða sæti verði hlutskipti Fram-liðsins. Stjarnan var fjórum mörkum yfir í hálfleik, 16:12.
Þar með hefur Stjarnan unnið allar þrjár viðureignir liðanna í Olísdeildinni á leiktíðinni.
Jafnt var á með liðunum framan af. Madeleine Lindholm kom Fram yfir, 7:6, eftir 11 mínútur. Stjarnan skoraði í kjölfarið þrjú mörk í röð og náði ákveðnum tökum á leiknum í kjölfarið. Mestur varð munurinn fimm mörk, 16:11, skömmu fyrir hálfleik.
Varnarleikur Fram var ekki sannfærandi án Steinunnar Björnsdóttur og sóknarleikurinn var hikandi og mistækur.
Framan af síðari hálfleik benti kannski ekki margt til þess að Fram kæmist inn í leikinn. Annar varð samt raunin. Fram tókst að koma róti á sóknarleik Stjörnunnar og vinna sig jafnt og þétt inn í leikinn. Tólf mínútum fyrir leikslok tókst Fram að jafna, 24:24, eftir nokkrar misheppnaðar tilraunir. Eftir það var leikurinn í járnum allt til á allra síðustu mínútum að Stjarnan náði þriggja marka forskoti eftir röð mistaka Framara.
Mörk Stjörnunnar: Eva Björk Davíðsdóttir 9/4, Stefanía Theodórsdóttir 5, Lena Margrét Valdimarsdóttir 5, Britney Cots 3, Helena Rut Örvarsdóttir 3, Anna Karen Hansdóttir 3, Elísabet Gunnarsdóttir 2, Hanna Guðrún Stefánsdóttir 1.
Varin skot: Darija Zecevic 10, 26,3%.
Mörk Fram: Perla Ruth Albertsdóttir 8, Erna Guðlaug Gunnarsdóttir 6, Kristrún Steinþórsdóttir 5, Madeleine Lindholm 3, Hekla Rún Ámundadóttir 3, Harpa María Friðgeirsdóttir 2, Þórey Rósa Stefánsdóttir 1.
Varin skot: Hafdís Renötudóttir 9, 23,1%.
Handbolti.is er í TM-höllinni og fylgdist með leiknum í textalýsingu hér fyrir neðan.
