Ágúst Elí Björgvinsson átti stórleik í marki Ribe-Esbjerg í dag þegar liðið tapaði fyrir Aalborg, 30:26, í Blue Water Dokken í Esbjerg í næst síðustu umferð dönsku úrvalsdeildarinnar í handknattleik karla. Ágúst Elí varði 17 skot, þar af eitt vítakast, 37%. Elvar Ásgeirsson skoraði þrjú mörk og átti þrjár stoðsendingar fyrir Ribe-Esbjerg. Arnar Birkir Hálfdánsson skoraði ekki mark fyrir Ribe-Esbjerg að þessu sinni.
Aron Pálmarsson lék ekki með Aalborg vegna meiðsla. Arnór Atlason er aðstoðarþjálfari liðsins. Álaborgarliðið er efst í deildinni með 43 stig eftir 25 leiki og GOG. Aalborg tekur á móti KIF Kolding í síðustu umferð deildarinnar. GOG fær Skjern í heimsókn.
Úrslit ráðast á miðvikudaginn
Ribe-Esbjerg er í 10. sæti og verður að vinna Holstebro í lokaumferðinni á miðvikdaginn til þess að komast í hóp átta efstu liða deildarinnar. Átta efstu liðin öðlast keppnisrétt í úrslitakeppninni um meistaratitilinn. Ekki aðeins verða leikmenn Ribe-Esbjerg að vinna síðasta leikinn heldur einnig að treysta á að Sönderjyske, sem er í áttunda sæti, nái ekki stigi í leik við Skanderborg Aarhus. Holstebro, sem Halldór Jóhann Sigfússon þjálfar, á einnig möguleika á sæti í átta liða úrslitum með sigri á Ribe-Esbjerg.
Daníel Freyr Andrésson, markvörður, kom ekkert við sögu hjá Lemvig í dag þegar liðið tapaði fyrir GOG á heimavelli, 34:25. Lemvig er í næst neðsta sæti deildarinnar.
