Kristján Örn Kristjánsson, Donni, skoraði níu mörk og var markahæsti leikmaður vallarins þegar lið hans PAUC sótti heim Limoges og tapaði, 33:30, í frönsku 1. deildinni í handknattleik í kvöld. Donni hefur nú átta tvo stórleiki í röð og kemur því af fullum krafti inn í landsliðið sem mætir Ísrael og Eistlandi á næstunni. Landsliðið kemur saman í Tel Aviv á mánudagskvöld.
PAUC er í 10. sæti af 16 liðum deildarinnar með 22 stig.
Reyndi við vítaköst
Viktor Gísli Hallgrímsson var að mestu sparaður í kvöld þegar lið hans, Nantes, vann Chambéry, 39:31, á útivelli. Viktor kom við sögu í skamman tíma í leiknum, spreytti sig á tveimur vítaköstum en tókst ekki að verja. Manuel Gaspar, landsliðsmarkvörður Portúgal, stóð lengst af í marki Nantes og var með 33% markvörslu þegar upp var staðið.
Í efsta sæti
Með sigrinum komst Nantes í efsta sæti deildarinnar. Liðið hefur 43 stig þegar 25 af 30 leikjum er lokið. Montpellier og PSG eru stigi á eftir og eiga leiki inni. Limoges er í 7. sæti.
35% hjá Grétari Ara
Annar markvörður, Grétar Ari Guðjónsson, stóð sig vel með Sélestat í kvöld. Frammistaða hans nægði ekki því Sélestat tapaði með 11 marka mun á heimavelli fyrir Toulouse, 33:22. Grétar Ari stóð í marki Sélestat annan hálfleikinn og varði átta skot, 35%.
Sélestat er neðst í frönsku 1. deildinni og fremur syrtir í álinn enn hitt hjá liðinu sem á fimm leiki eftir.
US Ivry sem Darri Aronsson er samningsbundinn, tapaði í heimsókn til Dunkerque, 34:32. Ivry er í fjórða neðsta sæti, fjórum stigum fyrir ofan Sélestat og tveimur á undan Istres.
Eins og komið hefur fram á handbolti.is þá er Darri fjarverandi vegna meiðsla.
