Alfreð Gíslason og lærisveinar hans í þýska landsliðinu hrósuðu öruggum sigri í Tallinn í Eistalandi í dag þegar þeir unnu landsliðs Eistland, 35:23, í 2. riðli undankeppni EM í handknattleik karla. Eins og gegn Bosníu á fimmtudagskvöldið þá var það öflugur leikur þýska liðsins í síðari hálfleik sem lagði grunn að sigrinum. Aðeins var eins marks munur að loknum fyrri hálfleik, 13:12.
Þjóðverjar hafa þar með fjögur stig í 2. riðli í efsta sæti. Austurríki kemur þar á eftir með tvö stig. Austurríkismenn áttu að leika í Bosníu í dag en viðureigninni var frestað eftir að leikmenn Bosníu voru ýmist settir í sóttkví eða einangrun við heimkomu frá Þýskalandi á föstudag eftir að smit greindist innan hópsins.
Þjóðverjar skoruðu tvö fyrstu mörk síðari hálfleiks og slógu þar með tóninn fyrir framhaldið. Um miðjan síðari hálfleik var munurinn orðinn níu mörk, 23:14, og 26:17, tíu mínútum fyrir leikslok.
Alfreð hafði varað við fyrir leikinn að Eistlendingar gætu verið erfiðir viðureignar, ekki síst þar sem þeir reyndu eftir megni að halda hraða leiksins niðri. Það tókst þeim í fyrri hálfleik í dag.
Ott Varik og Karl Toom skoruðu fjögur mörk fyrir eistneska landsliðið.
Julius Kühn var atkvæðamestur Þjóðverja. Hann skoraði níu mörk. Uwe Gensheimer, Hendrik Pekeler, Patrick Wiencek og Marcel Schiller skoruðu fjögur mörk hver.
Hinn tvítugi leikstjórnandi,Þjóðverja, Juri Knorr, lék mikið í tveimur fyrstu leikjunum undir stjórn Alfreð. Hér skorar Knorr annað af mörkum sínum gegn Eistum í dag.
