Valur tók KA/Þór í kennslustund í handknattleik í Olísdeild kvenna í Origohöllinni í kvöld. Nítján mörk skildu liðin að þegar flautað var til leiksloka, 36:17, eftir að sjö mörkum skakkaði þegar fyrri hálfleikur var að baki, 18:11.
Það var svo sannarlega ekki neitt vanmat hjá Íslandsmeisturum kvenna í leik þeirra í kvöld.
Valsliðið varðist afar vel, ekki síst í síðari hálfleik. Viðureign liðanna í kvöld markaði upphaf annarrar umferðar deildarinnar en þrír leikir fara fram á morgun.
KA/Þór er án stiga eftir tvo leiki en Íslandsmeistarar Vals eru með fjögur stig.
Ágúst Þór Jóhannsson þjálfari Vals mætti til leiks í kvöld eftir að hafa verið á sjúkralista fyrir viku eftir að hafa gengist undir aðgerð vegna gamalla íþróttameiðsla. Ágúst nýtti tækifærið í kvöld og leyfði öllum leikmönnum sem voru á leikskýrslu að spreyta sig.
Leikjadagskrá Olísdeilda og staðan.
Mörk Vals: Ásdís Þóra Ágústsdóttir 7, Þórey Anna Ásgeirsdóttir 6/3, Thea Imani Sturludóttir 5, Hildigunnur Einarsdóttir 5, Lilja Ágústsdóttir 4, Ásthildur Jóna Þórhallsdóttir 3, Anna Úrsúla Guðmundsdóttir 2, Auður Ester Gestsdóttir 2, Elín Rósa Magnúsdóttir 1, Kristbjörg Erlingsdóttir 1.
Varin skot: Hafdís Renötudóttir 9/1, 60% – Sara Sif Helgadóttir 6, 35,3%.
Mörk KA/Þórs: Nathalia Soares Baliana 5, Telma Lísa Elmarsdóttir 3, Anna Þyrí Halldórsdóttir 3, Lydía Gunnþórsdóttir 2/1, Bergrós Ásta Guðmundsdóttir 2, Kristín B. Gunnarsdóttir 1, Hildur Magnea Valgeirsdóttir 1.
Varin skot: Matea Lonac 7/1, 19,4% – Sif Hallgrímsdóttir 4/1, 36,4%.
