Valur vann öruggan sigur á Haukum í fyrri undanúrslitaleik Poweradebikarkeppni kvenna í handknattleik í Laugardalshöll í kvöld, 28:19, eftir að hafa verið sjö mörkum yfir í hálfleik, 16:9.
Valur leikur þar með til úrslita í keppninni annað árið í röð og getur varið bikarmeistaratignina sem liðið vann fyrir ári síðan.
Úrslitaleikurinn fer fram í Laugardalshöll á laugardaginn og hefst klukkan 13.30. Síðar í kvöld skýrist hvort andstæðingur Vals verður ÍBV eða Selfoss.
Valur skoraði þrjú fyrstu mörkin og Haukar svöruðu að bragði með þremur mörkum. Eftir það var leikurinn jafn allt fram á 17. mínútu. Valur skoraði þrjú mörk á skömmum tíma, náðu fjögurra marka forskoti, 7:11. Botn datt úr sóknarleik Hauka, boltinn gekk illa. Valsliðið gekk á lagið og náði öruggu forskoti fyrir hálfleik.
Í síðari hálfleik var um einstefnu að ræða. Valsliðið náði fljótlega 10 marka forskoti og hélt því meira og minna leikinn út. Haukar virtust ekki hafa mikið sjálfstraust gegn frábærum leik Valsliðsins.
Mörk Vals: Thea Imani Sturludóttir 7, Mariam Eradze 4, Hildigunnur Einarsdóttir 3, Lilja Ágústsdóttir 3, Elín Rósa Magnúsdóttir 3, Sara Dögg Hjaltadóttir 3, Sigríður Hauksdóttir 2, Þórey Anna Ásgeirsdóttir 2, Hildur Sigurðardóttir 1.
Varin skot: Hrafnhildur Anna Þorleifsdóttir 7, Saga Sif Gísladóttir 3.
Mörk Hauka: Elín Klara Þorkelsdóttir 9, Sara Odden 4, Sonja Lind Sigsteinsdóttir 2, Ragnheiður Ragnarsdóttir 1, Natasja Hammer 1, Ena Car 1, Ragnheiður Sveinsdóttir 1.
Varin skot: Margrét Einarsdóttir 5, Elísa Helga Sigurðardóttir 3.
Handbolti.is var í Laugardalshöll og fylgdist með leiknum í textalýsingu hér fyrir neðan.
