Sunna Guðrún Pétursdóttir markvörður fingurbrotnaði fyrir hálfum mánuði og gat þar af leiðandi ekki leikið með GC Zürich í gærkvöld þegar liðið vann stórsigur á smáliðinu Weinfelden, 42:13, í 16-liða úrslitum svissnesku bikarkeppninnar í handknattleik í gærkvöld. Harpa Rut Jónsdóttir var að vanda með GC Zürich í leiknum og lét að sér kveða. Hún skoraði m.a. tvö mörk.
„Ég tók ekki þátt í leiknum í kvöld. Ég brotnaði á tveimur fingrum fyrir tveimur vikum og þurfti að fara í aðgerð,“ sagði Sunna Guðrún í skilaboðum til handbolta.is í gærkvöld þegar forvitnast var hjá henni um lyktir leiksins.
Úr leik fram að jólum
„Ég verð væntanlega frá í fjórar vikur til viðbótar og næ örugglega ekki síðustu leikjunum fyrir jól,“ sagði Sunna Guðrún ennfremur.
Keppni hefur legið niðri í efstu deild kvenna í Sviss í meira en mánuð vegna undirbúnings og síðar þátttöku landsliðs Sviss á Evrópumeistaramótinu í Norður Makedóníu, Slóveníu og Svartfjallalandi.
Sunna Guðrún gekk til liðs við GC Zürich í sumar frá KA/Þór. Harpa Rut kom einnig til GC Zürich fyrir tímabilinu en hún hefur undanfarin ár búið og leikið í Sviss, m.a. með LK Zug. Harpa varð m.a. bæði meistari og bikarmeistari með LK Zug áður en hún söðlaði um.
