Stórskyttan efnilega heldur tryggð við sitt félag

Örvhenta skyttan efnilega, Tinna Sigurrós Traustadóttir, hefur framlengt samning sinn við handknattleiksdeild Selfoss.

Tinna Sigurrós, sem er aðeins 17 ára, var máttarstólpi í ungu Selfossliði í Grill66-deildinni á síðasta keppnistímabili og var m.a. markahæsti leikmaður liðsins.

Tinna Sigurrós fór á kostum með U17 ára landsliðinu í B-deild Evrópumótsins sem haldið var í Litáen í sumar og var m.a. valin í úrvalslið mótsins.

„Deildin er gríðarlega ánægð að Tinna skuli framlengja við liðið og verður spennandi að fylgjast með Selfossliðinu í vetur,“ segir í tilkynningu handknattleiksdeildar Selfoss.