„Það eru heldur fleiri miðar farnir út núna en fyrir fyrsta leikinn,“ sagði Theódór Hjalti Valsson starfsmaður Vals við handbolta.is í morgun spurður hvort líflegt væri yfir sölu aðgöngumiða á þriðja leik Vals og ÍBV í úrslitum Íslandsmóts karla í handknattleik sem fram fer í Orgohöllinni á Hlíðarenda í kvöld. Flautað verður til leiks klukkan 19.30.
„Þetta er í lagi en gæti verið meira,“ sagði Theódór Hjalti en vænta má þess að margir kaupi miða við dyrnar í Origohöllinni. Aðgöngumiða er hægt að kaupa á smáforritinu stubbur sem aðgengilegt er í öllum farsímum.
Á annað hundrað í hópferð
Eyjamenn hafa heldur betur tekið við sér eftir að þeir unnu aðra viðureignina við Val í rífandi góðri stemningu á heimavelli á síðasta sunnudag. Vilmar Þór Bjarnason framkvæmdastjóri handknattleiksdeildar ÍBV segist vera kominn með að minnsta kosti 150 manns í hópferð sem handknattleiksdeildin hefur veg og vanda af.
Eyjamenn í höfuðborginni mæta vel
„Ég veit af mörgum öðrum sem fara á eigin vegum ásamt því að margir Eyjamenn eru búsettir á höfuðborgarsvæðinu og mæta iðulega vel á leiki okkar,“ sagði Vilmar Þór.
Ef þörf verður á hinkrar Herjólfur við með síðustu ferð sína frá Landeyjarhöfn til þess að allir Vestmanneyingar sem vilja heim í kvöld komist á leiðarenda.
Kaupa ekki í ríkum mæli í forsölu
„Samvæmt upplýsingum frá Val eru svipaðar sölutölur frá okkur og á fyrsta leiknum, en Eyjamenn eru ekki þekktir fyrir að kaupa miða í forsölu þannig ég býst við hörku mætingu í kvöld,“ sagði glaðbeittur framkvæmdastjóri handknattleiksdeildar ÍBV, Vilmar Þór Bjarnason. Eyjamenn troðfylltu íþróttamiðstöðina í Vestmannaeyjum á sunnudaginn á leik tvö, íklæddir sínum hvítu keppnisbúningum. Lík staða verður á teningnum í kvöld ef að líkum lætur.
Á laugardaginn klukkan 16 verður fjórða viðureign liðanna í Vestmannaeyjum.
