Spænska landsliðskonan í handknattleik, Carmen Martin, greinir frá því á instagram síðu sinni að hún hafi tvisvar sinnum greinst með kórónuveiruna eftir komu til Japans í síðustu viku þar sem fyrir dyrum stendur að hún leiki með spænska landsliðinu í handknattleikskeppni Ólympíuleikanna.
Martin, sem er 33 ára gömul og er ein fremsta handknattleikskona Spánar, segir að af þeim sökum hafi hún ekki fengið heimild til þess að fylgja spænska landsliðinu eftir inn í ólympíuþorpið.
Martin fór í skimun við komuna til Tókýó 14. júli og aftur daginn eftir. Í bæði skiptin var niðurstaðan jákvæð. Hún gekkst undir þriðju skimun á föstudaginn. Niðurstaðan hennar var önnur því þá var sýni hennar neikvætt. Martin segir að hún eigi fyrir höndum að fara í fjórðu skimunina. Reynist sú neikvæð fær hún væntanlega að hitta samherja sína í spænska landsliðinu fljótlega á eftir. Ef niðurstaðan verður jákvæð þarf Martin að dúsa áfram í einangrun.
Fyrsti leikur spænska landsliðsins í handknattleikskeppni Ólympíuleikanna verður eftir viku gegn sænska landsliðinu.
- „Ég er mjög svekktur“
- HK lagði Íslandsmeistarana – annar sigur hjá Gróttu og Haukum
- Afturelding vann fyrsta leikinn í Grill 66-deildinni
- Ungversku meistararnir fara með tvö stig frá Berlín
- Janus Daði hrósaði sigri gegn gömlu samherjunum – níu marka tap Fredericia
