- Auglýsing -

Sveinn og Hafþór og félagar unnu fornt veldi

Sveinn Andri Sveinsson, leikmaður Empor Rostock. Mynd/Empor Rostock

Sveinn Andri Sveinsson og Hafþór Már Vignisson voru í stóru hlutverki hjá þýsku liðinu Empor Rostock í kvöld þegar liðið lyfti sér upp úr botnsæti 2. deildar með góðum sigri, 29:24, á hinu forna stórliði TV Großwallstadt sem leikur nú undir stjórn Króatans Igor Vori.


Sveinn Andri skoraði fimm mörk í sex skotum auk þess sem hann átti þrjár stoðsendingar. Hafþór Már sem er nýlega kominn til baka eftir meiðsli skoraði tvö mörk og gaf einnig tvær stoðsendingar. Sveinn Andri var markahæsti leikmaður Empor Rostock sem er komið upp í 18. sæti deildarinnar með sex stig eftir 13 leiki og er aðeins tveimur stigum á eftir Elbflorenz frá Dresden. Gestaliðið Motor Zaporozhye og Wolfe Würzburg reka lestina með fjögur stig hvort.


TV Großwallstadt er í 12. sæti með 12 stig sem er fjarri þeim vonum sem gerðar voru til liðsins en því var ætlað að blanda sér af hörku í toppbaráttuna eftir mörg mögur ár.


Sveinn Andri og Hafþór Már gengu til liðs við Empor Rostock í sumar. Reyndar mætti Sveinn Andri til leiks á ellefu stundu en virðist engu að síður hafa fallið vel inn í hópinn hjá liðinu og gert það gott. Verið einn besti maður liðsins fram til þessa. Gengi liðsins hefur ekki verið sem best og ekki er langt síðan þjálfarinn var látinn hirða hatt sinn og staf.

- Auglýsing -
- Auglýsing -

Nýjustu fréttir

- Auglýsing -