„Þetta var svekkjandi tap í leik sem var nánast í járnum allan tímann,“ sagði Ágúst Þór Jóhannsson þjálfari Vals, við handbolta.is í kvöld eftir að Valur tapaði með þriggja marka mun fyrir Dunajská Streda í fyrri viðureign liðanna í 1. umferð Evrópubikarkeppni kvenna í handknattleik í kvöld, 29:26. Leikurinn fór fram í Dunajská í Slóvakíu. Liðin mætast öðru sinni á sama stað klukkan 18 á morgun.
„Við vorum klaufar að vera ekki tveimur mörkum yfir í hálfleik,“ sagði Ágúst Þór en staðan var jöfn eftir fyrri hálfleik, 13:13.
„Síðari hálfleikur var járn í járn og þess vegna er svekkjandi að hafa misst þær þremur mörkum framúr okkur í lokin. Mesti munurinn á liðunum var þegar flautað var til leiksloka,“ sagði Ágúst Þór sem er strax farinn að spá í síðari leikinn á morgun enda er ekki ráð nema í tíma sé tekið.
„Mér finnst við eiga inn í varnarleiknum og líka í markvörslunni. Þetta tvennt getur skilað okkur fleiri mörkum eftir hraðaupphlaup. Sóknarleikurinn var annars góður hjá okkur. Við opnuðum vörnina hjá Dunajaská hvað eftir annað.
Við gerum okkur grein fyrir að leikurinn á morgun verður erfiður gegn góðum andstæðingi í mikilli stemningu. Við teljum hinsvegar að möguleikarnir séu fyrir hendi og ætlum að leggja allt í sölurnar. Þriggja marka munur er ekki mikið í alþjóðlegum handknattleik og takist okkur að leika vel verðum við ekki lengi að vinna muninn upp. Til þess verðum við að fá jafnari og betri frammistöðu leikinn út, ekki síst varnarlega. Eins verðum við að fara betur með opin marktækifæri,“ sagði Ágúst Þór Jóhannsson sem var á símalínunni frá Dunajská í Slóvakíu.
Mörk Vals: Þórey Anna Ásgeirsdóttir 8, Hildigunnur Einarsdóttir 6, Mariam Eradze 5, Elín Rósa Magnúsdóttir 2, Sigríður Hauksdóttir 2, Hildur Björnsdóttir 1, Morgan Marie Þorkelsdóttir 1, Thea Imani Sturludóttir 1.
Varin skot: Sara Sif Helgadóttir 6, Hrafnhildur Anna Þorleifsdóttir 1.
Síðari leikur Vals og Dunajaská verður í textalýsingu á handbolta.is. Flautað verður til leiks klukkan 18 á morgun.
