Svíar standa vel að vígi í keppni um sæti í lokakeppni Evrópumótsins í handknattleik karla á næsta ári eftir að þeir unnu Svartfellinga, 27:24, í Lundi í dag í 3. umferð 8. riðils undankeppninnar. Sænska landsliðið hefur unnið alla leiki sína til þessa og er í efsta sæti riðilsins. Rúmenar hafa tvö stig eftir tvo leiki, Svartfellingar tvö stig að loknum þremur leikjum. Kósvóvó rekur lestina án stiga eftir tvær viðureignir.
Svartfellingar gáfu Svíum lítið eftir í Lundi í dag en sænska landsliðið var nánast skipað sömu leikmönnum og hrepptu silfurverðlaun á heimsmeistaramótinu sem fram fór í janúar. Aðeins var eins marks munur að loknum fyrri hálfleik, 15:13.
Mörk Svíþjóðar: Niclas Ekberg 8, Lucas Pellas 3, Jim Gottfridsson 3, Linus Persson 3, Jonathan Carlsbogard 2, Hampus Wanne 2, Fredric Pettersson 2, Albin Lagergren 2, Felix Claar 1, Anton Lindskog 1.
Mörk Svartfjallalands: Branko Vujovic 6, Milos Vujovic 6, Milos Bozovic 5, Vasko Sevaljevic 4, Nebojsa Smic 1, Nebojsa Simovic 1, Nemanja Grbovic 1.
Sætaskipti á toppnum
Slóvenar unnu toppslag 5. riðils í Celje í Slóveníu í dag þegar Pólverjar komu í heimsókn, 32:29. Lið þjóðanna höfðu þar með sætaskipti á toppnum. Slóvenar smelltu sér því í toppsæti riðilsins. Þeir eru með fimm stig að loknum þremur leikjum. Pólverjar hafa fjögur stig í öðru sæti og Hollendingar, undir stjórn Erlings Richardssonar, eru í þriðja sæti með þrjú stig. Tyrkir reka lestina án stiga. Hollendingar léku ekki í dag.
Eftir jafnan fyrri hálfleik í Celje voru heimamenn sterkari í síðari hálfleik og unnu sannfærandi sigur með þriggja marka mun.
Mörk Slóveníu: Gasper Marguc 8, Jure Dolenec 5, Matej Gaber 5, Blaz Janc 4, Tadej Mazej 3, Gregor Potocnik 2, Miha Zarabec 2, Stas Skube 1.
Mörk Póllands: Szymon Sicko 8, Michal Daszek 7, Maciej Gebala 6, Przemyslaw Krajewski 3, Jan Czuwara 1, Maciej Pilitowski 1, Kamil Syprzak 1, Rafal Przybylski 1, Szymon Dzialakiewicz 1.
