Svíi á leiðinni í Safamýri

Fram hefur samið við sænska handknattleikskonu, Emmu Olsson, um að leika með liðinu næstu tvö árin. Frá þessu greindi félagið í morgun á samfélagsmiðlum. Olsson kemur í Safamýrina frá Önnereds-liðinu en hún er sögð uppalin hjá Eslöv.

„Emma er 24 ára hávaxin línumaður og varnarmaður sem mun styrkja okkar lið sérstaklega varnarlega. Hún kemur til landsins í ágúst og mun hefja æfingar með liðinu í framhaldinu,“ segir í tilkynningu handknattleiksdeildar Fram.

Olsson er ætlað að fylla skarð Steinunnar Björnsdóttur sem verður frá keppni fram á næsta ár eftir að hafa slitið krossband í hné í lok mars.