Handknattleiksmaðurinn öflugi, Tandri Már Konráðsson, verður áfram í herbúðum Stjörnunnar næstu tvö ár. Hann hefur staðfest ætlun sína með því að rita undir tveggja ára samning við félagið.
Orðrómur hafði verið upp um að til greina kæmi að Tandri Már söðlaði um í sumar. Ljóst má vera eftir tilkynningu Stjörnunnar í gær að ekkert verður af vistaskiptum.
Tandri Már er Stjörnumaður að upplagi. Hann gekk til liðs við Stjörnuna á nýjan leik árið 2019 eftir að hafa leikið Danmörku og í Svíþjóð í nokkur ár og þar áður með HK. Tandri Már var m.a. Íslandsmeistari með HK 2012.
Síðustu árin hefur Tandri Már verið fyrirliði Stjörnunnar. Hann hefur leikið nærri 30 A-landsleiki og var síðast með landsliðinu fyrir tveimur árum í síðustu leikjum undan EM 2022. Tandri Már úlnliðsbrotnaði í undanúrslitaleik Poweradebikarkeppninnar rétt eftir miðjan mars og tók ekki beinan þátt í leikjum Stjörnunnar eftir það.
