Óðinn Þór Ríkharðsson og liðsmenn svissneska meistaraliðsins Kadetten Schaffhausen töpuðu í dag á heimavelli fyrsta úrslitaleiknum um meistaratitilinn fyrir HC Kriens-Luzern, 32:30. Vopnin snerust í höndum leikmanna Kadetten á síðustu 10 mínútum leiksins. Þeir skoruðu aðeins eitt mark á átta mínútum. Á sama tíma gengu leikmenn HC Kriens á lagið og skutust fram úr og unnu.
Kadetten Schaffhausen hafði fjögurra marka forskot að loknum fyrri hálfleik, 20:16. Sóknarleikurinn gekk ekki sem skildi í síðari hálfleik, ekki síst síðustu 10 mínúturnar eins og áður sagði.
Óðinn Þór skoraði sex mörk, þar af þrjú úr vítaköstum, og var næst markahæsti leikmaður liðsins. Luka Maros skoraði níu mörk. Marin Sipic skoraði átta mörk fyrir HC Kriens sem á heimaleik á fimmtudaginn.
Vinna þarf þrjá leiki til að verða svissneskur meistari í handknattleik.
