Andrea Jacobsen átti fína leik með nýjum samherjum sínum í danska úrvalsdeildarliðinu Silkeborg-Voel í dag gegn öðru úrvalsliði, Horsens, í 16-liða úrslitum dönsku bikarkeppninnar. Frammistaða Andreu dugði þó ekki ein og sér til sigurs þrátt fyrir gott útlit að loknum fyrri hálfleik. Leikmenn Horsens unnu með fjögurra marka mun á heimavelli, 33:29, eftir að hafa verið þremur mörkum undir í hálfleik, 15:12.
Andrea, sem gekk óvænt til liðs við Silkeborg-Voel í sumar frá EH Aalborg skoraði fjögur mörk í fjórum skotum og var næst markahæst. Þetta var fyrsti leikur Andreu með Silkeborg-Voel, annað hvort í bikarkeppni eða deildarkeppni.
Flautað verður til leiks í dönsku úrvalsdeildinni á föstudaginn. Andrea og samherjar hefja keppni á heimavelli gegn Ringkøbing Håndbold. Andrea verður eina íslenska handknattleikskonan sem leikur í dönsku úrvalsdeildinni á keppnistímabilinu sem framundan er.
